නියෝජ්‍ය අමාත්‍ය පාලිත තෙවරප්පෙරුම ගස් කපන ඡායාරූප පෙළක් ඔහුගේම ෆේස්බුක් ගිණුමට පසුගිය දා එක්කර තිබුණා.ඒ, වසර 130 ක් පැරණි බවට ප්‍රකාශ වන ගසක් කැපීම සම්බන්ධයෙන්

බුලත්සිංහල තිබොට්ටව  නාය යෑමේ අවධානම් ඇති ප්‍රදේශයක මෙම ගස් කැපීම සිදුකර ඇති බවයි වාර්තා වන්නේ.

මෙම විශාල ගස් නිවෙස්වලට කඩා වැටීමට ආසන්න නිසා  ඉවත් කර දෙන ලෙස ප්‍රාදේශීය ලේකම් කාර්යාලය වෙත ද අදාල වතු සමාගමටද දැනුම් දී ඇතත් එය ඉටු නොවූ නිසා  නියෝජ්‍ය අමාත්‍ය පාලිත තෙවරප්පෙරුම මෙලෙස ගස් කැපීම සිදුකර ඇති බවයි පැවසුණේ.

කෙසේවෙතත් මේ සම්බන්ධයෙන් කරුණු දැනගැනීම සඳහා තෙවරප්පෙරුම අමාත්‍යවරයාගෙන් විමසූ අවස්ථාවේ මෙම සියලු කරුණු ප්‍රතික්ෂේප කරමින් පැවසුවේ මෙම ගස අනිවාර්යයෙන් කපා ඉවත් කලයුතු ගසක් බවයි.

කළුතර බුලත්සිංහල ආසනයේ තිබ්බෝට්ටාව ග්‍රාමයේ ඇති කන්දක මෙම ගස පිහිටා ඇති අතර පවතින සුළන් තත්වයෙන් මෙම ගස සෙලවීම නිසා කන්ද ඉරිතලා තිබු බව අමාත්‍යවරයා පවසා තිබෙනවා. මේ හේතුව නිසා අදාළ බලධාරීන්ට මේ සම්බන්ධයෙන් දැනුම් දුන්නත් කිසිවෙකුත් ක්‍රියාත්මක වී නොමැති බවයි වාර්තා වන්නේ. මේ තත්වය මත එම කන්ද පාමුල සිටින ජනතාවගේ ආරක්ෂාව මත තමා මැදිහත්වී මෙම ගස කැපූ බවත් එම ගස ඇල්බීසියා වර්ගයට අයත් ගසක් බවත් අමාත්‍යවරයා වැඩිදුරටත් සඳහන් කර තිබෙනවා.

නමුත් ගස් කැපීම නීතිවිරෝධී බවත් එමෙන්ම මෙම ගස් මෙලෙස කැපීම නිසා ගංවතුර වැනි ආපදා තත්වයන් ඉතාමත් පහසුවෙන් ඇතිවන බවත් බොහෝ දෙනෙකු මේ පිළිබඳව අදහස් දක්වා තිබුණා.

මේ ගැන අමාත්‍යවරයා පවසන්නේ තමා ජනතාවට කරන සේවය නතරකිරීම සඳහා ඇතැම් පාර්ශව වැරදි ප්‍රචාර දියත් කරන බවයි.

මෙම ගස් කැපීම සම්බන්ධයෙන් ඔහු සිය ෆේස්බුක් ගිණුම ඔස්සේ ඡායාරූප පළ කිරීමත් සමග සමාජ ජාල මාධ්‍ය තුළ අමාත්‍යවරයාට එරෙහි කතාබහක් නිර්මාණය වෙමින් පවතිනවා.

ඒ අතර මෙම ගස් කැපුවේ ඇයිද යන්න පිළිබඳව වීඩියෝවක් මේවනවිට නියෝජ්‍ය අමාත්‍ය පාලිත තෙවරප්පෙරුම සිය ෆේස්බුක් ගිණුමට එක්කර තිබෙනවා.

එය පහතින් නැරඹිය හැකියි.