බොදු බල සේනා සංවිධානයේ නායක ගලගොඩ අත්තේ ඥානසාර හිමියන්ට එරෙහි චෝදනා විභාග කිරීමට අභියාචනාධිකරණය දින නියම කර තිබේ.

මාධ්‍යවේදී ප්‍රගීත් එක්නැළිගොඩ අතුරුදහන් කරවීම සම්බන්ධ නඩුවේදී එම නඩුවට බාධා වන අයුරින් හැසිරිමේ චෝදනා මත එවකට හෝමාගම මහේස්ත්‍රාත්වරයාව ලෙස කටයුතු කළ රංග දිසානායක විසින් අභියාචනාධිකරණයට මෙම පැමිණිල්ල ඉදිරිපත් කර ඇත.

නීතිපතිවරයා විසින් ගොණු කර තිබූ චෝදනා අද (12) කැඳවු අවස්ථාවේදී අදාළ චෝදනා පත්‍රය ජුලි මස 18,19 සහ 20 දිනවල විභාගයට ගැනීමට අභියාචනාධිකරණ විනිසුරුවන් වන A.T. B. දෙහිදෙනිය සහ දේවිකා තෙන්නකෝන් නියෝග කළේය.

ඥානසාර හිමි අධිකරණයට පැමිණ නොසිටි අතර නීතිපතිවරයා උන්වහන්සේ අත්අඩංගුවට ගැනීමට වරෙන්තු ඉල්ලා සිටි නමුත් අධිකරණය එය ප්‍රතික්‍ෂේප කරමින් කියා සිටියේ මීලඟ නඩු දිනයේ දී නොපැමිණියහොත් අත්අඩංගුවට ගැනීමට වරෙන්තු නිකුත් කරන බවයි.

ගලගොඩ අත්තේ ඥානසාර හිමියන්ට ජීවිත තර්ජන ඇති බැවින් එහිමියන් හට අධිකරණයට පැමිණිය නොහැකි බව විත්තිය වෙනුවෙන් පෙනී සිටි ජනධිපති නීතිඥ ටිරන්ත වරලියද්ද පැවසු අතර එවැන්නක් වාර්තා නොවන බව කියා සිටි අධිකරණය ඊළඟ නඩු දිනයේ අනිවාර්යයෙන් පැමිණිය යුතු බව සඳහන් කළේය.