දින කිහිපයකට ඉහතදී ජනාධිපති මෛත්‍රීපාල සිරිසේන මහතා විසින් නෙලුම් පොකුණ රඟහල ඉදිකිරීම සම්බන්ධයෙන් සිදුකරන ලද ප්‍රකාශය වැරදි බවත්, එම ඉදිකිරීමට අදාළව චන්ද්‍රිකා බණ්ඩාරනායක කුමාරතුංග ජනාධිපතිතුමියගේ සමයේ පිහිටුවා ඇති ශිලා ලිපිය තවමත් නිරුපද්‍රිතව ඇති බවටත් මහින්ද රාජපක්ෂ මහතාගේ මාධ්‍ය ඒකකය විසින් නිවේදනයක් නිකුත් කර තිබේ.

ඇත්ත වශයෙන්ම එම සමරු ඵලකය එතනින් ඉවත් කර නැති බව ජනාධිපතිවරයා දැන සිටියේ නැද්ද? නැතිනම් එය දැන දැනම එම ප්‍රකාශය සිදු කලේද? එසේ නම් ඒ ඇයි?

පසුගිය කාලය පුරාම රාජපක්ෂ රෙජීමය විසින් නඩත්තු කල සංවර්ධනාත්මක ප්‍රතිරූපයක් විය. විදේශ රටවලින් අධික පොලියට ගන්නා ණය මගින් එම ණය මුදල් වල වටිනාමෙන් 1/4 වටිනාකමකින් යුතු ව්‍යාපෘති සිදුකරමින් දැවැන්ත කොමිස් මුදලක් ලබා ගැනීම ඔවුන්ගේ නොනිල ආදායම් මාර්ගය විය. ඒ අතරම විදේශ රටවලින් ලද ආධාර ව්‍යාපෘති පවා සිය ගිණුමට බැර කරගනිමින් රාජපක්ෂ පවුලේ බූදලයෙන් ගොඩනගන දෑ ලෙස මහත් උත්කර්ෂයෙන් සමාජගත කිරීම කිසිදු හිරිකිතයකින් තොරව සිදුකරන ලදි. අවසානයේ සියලූම ව්‍යාපෘති මහින්ද රාජපක්ෂ නාමකරණයට ලක්වූ අතර ගුවන්තොටුපලේ සිට නගර සභාවේ කක්කුසිය දක්වාම සියල්ල රාජපක්ෂලාගේ බූදලයෙන් ගොඩනැගූ ඒවාම විය.

නමුත් සත්‍ය තත්වය එයද? අද රාජපක්ෂ මහතා විසින් මාධ්‍ය නිවේදනය නිකුත්කරන තෙක්ම බොහෝ දෙනෙකුට අනුව නෙලුම් පොකුණ රඟහල මහින්ද රාජපක්ෂ ගොඩනැගූ දෙයකි. නමුත් සත්‍ය එය නොවන බවත් එම රඟහල ඉදිකිරීම ආරම්භ කර ඇත්තේ චන්ද්‍රිකා බණ්ඩාරනායක සමයේදී බවත් අද ඔහුගේම මාධ්‍ය නිවේදනයෙන් තහවුරු වී ඇත. යම් හෙයකින් ජනාධිපතිවරයා පෙරකී ප්‍රකාශය නිකුත් නොකලේ නම් මෙරට බොහෝ පිරිසක් තවමත් සිතා සිටින්නේ නෙලුම් පොකුණ මහින්දගේ නිර්මාණයක් ලෙස නොවේද?

පෙර පැවති රජයක් ආරම්ඹ කල ව්‍යාපෘතියක් නව රජයක් මගින් අවසන් කිරීමේ වරදක් නැත. මහින්ද රාජපක්ෂ සමයේ ආරම්භ කර මුල්‍ය හිගතාවයන් නිසා අතර මඟ නැවතුන බොහෝ ව්‍යාපෘති අද වර්ථමාන රජය යටතේ පියවරෙන් පියවර නැවත ආරම්භ වී ඇත. ආණ්ඩුව වෙනස් වුවද සියලු ව්‍යාපෘති වල බරපැන දරන්නේ මේ රටේ මහජනතාවය. ඉදින් රජයේ ව්‍යාපෘති දේශපාලකයින්ගේ නමට ලියාගැනීම නිර්ලජ්ජිතය. නුසුදුසුය.

ජනාධිපති මෛත්‍රීපාල සිරිසේන මහතා විසින් සංවර්ධන ව්‍යාපෘති වල ඇත්ත කීර්තිනාමය හිමිවිය යුත්තේ කාටද යන්න රටේ ජනතාවට මහින්ද රාජපක්ෂගේම පාර්ශවයෙන් දැන ගැන්වීමට සැලැස්වීම සදහා දෙන ලද ලණුව මහින්ද විසින් තලු මරමින් අනුභව කර ඇත. හෙට දිනයේදී මෛත්‍රීපාල සිරිසේන මහතා තවත් සංවර්ධන ව්‍යාපෘතිය වල නම් කිවහොත් රාජපක්ෂලා ඒවායේ මුල්ගල්වල ඇත්ත කතාවද එලියට දානු ඇත. මෛත්‍රී දෙන ලණුව මහින්ද හොදට කනු ඇත. කෙසේ හෝ අවසානයේ ජනතාව සත්‍ය තේරුම්ගනු ඇත.