ශ්‍රී ලංකාවේ නව ආයෝජන රැසකට මැලේසියාව සූදානම් බව මැලේසියා අග්‍රාමාත්‍ය අබ්දුල් රසාක් මහතා පවසයි.

මැලේසියාවේ තෙදින නිල සංචාරයක නිරත ජනාධිපති ගරු මෛත්‍රීපාල සිරිසේන මැතිතුමා සහ මැලේසියා අග්‍රාමාත්‍ය අබ්දුල් රසාක් මහතා අතර නිල හමුව අද (16) පෙරවරුවේ මැලේසියා අග්‍රාමාත්‍ය කාර්යාලයේදී සිදු කෙරුණු අතර එහිදී මැලේසියා අග්‍රාමාත්‍යවරයා මේ බව ප්‍රකාශ කළේය.

ශ්‍රී ලංකා ජනාධිපතිවරයා පිළිගැනීමට ඉතා අලංකාරවත් පිළිගැනීමේ උත්සවයක් අග්‍රාමාත්‍ය කාර්යාල පරිශ්‍රයේ දී සංවිධානය කර තිබූ අතර හමුදා උත්තමාචාර සහිතව ඉතා අභිමානවත් අයුරින් එම පිළිගැනීම සිදු විය.

ජනාධිපතිතුමා ඉතා උණුසුම් ලෙස පිළිගත් මැලේසියා අග්‍රාමාත්‍යවරයා රතු පලස මතින් ශ්‍රී ලංකා ජනාධිපතිතුමා අග්‍රාමාත්‍ය කාර්යාලය වෙත කැඳවාගෙන යනු ලැබීය. දෙරටේ අතීත මිතුදම මැනවින් විදාහ දක්වමින් එම මග දෙපස දෙරටේ ජාතික ධජවලින් අභිමානවත් අයුරින් සරසා තිබෙණු දක්නට ලැබිණි.

අනතුරුව නායක දෙපළ නිල සාකච්ඡා සඳහා එක් වූහ.

ඉන් අනතුරුව ශ්‍රී ලංකාව සහ මැලේසියාව අතර ද්වි පාර්ශවික සාකච්ඡා ආරම්භ කෙරුණු අතර විදේශ රැකියා, තරුණ සංවර්ධන, සංචාරක, සංස්කෘතික හා කෘෂිකාර්මික ක්ෂේත්‍රවලට අදාළ ගිවිසුම් 05 කට එහිදී දෙරටේ නායකයින් ඉදිරියේ අත්සන් තැබිණි.

මෙහිදී අදහස් දැක්වූ ජනාධිපතිතුමා ප්‍රකාශ කළේ රට තුළ සංහිඳියාව ගොඩනැඟීම සහ ස්ථාවර ආර්ථීක සංවර්ධනයක් ඇති කිරීම යන කරුණු දෙක තම ප්‍රමුඛ අභිලාෂයන් බවයි.

රටේ සංහිඳියා වැඩපිළිවෙළ ශක්තිමත් කිරීමට රජය කැපවී සිටින අතර ස්ථාවර ආර්ථීක සංවර්ධනයක් ඇති කිරීම සඳහා සියලූ හිත මිතුරු විදේශ රාජ්‍යයන්හි සහය ලබා ගනිමින් කටයුතු කරමින් සිටින බව ජනාධිපතිතුමා ප්‍රකාශ කළේය.

ශ්‍රී ලංකාව සහ මැලේසියාව අතර අත්සන් තැබුණු නව ගිවිසුම් තුළින් දෙරට අතර සංචාරක, අධ්‍යාපන සහ කෘෂිකර්ම මෙන්ම විදේශ රැකියා ක්ෂේත්‍රවල නව සබඳතා රැසක් ගොඩනැගෙනු ඇති බව පැවසූ ජනාධිපතිතුමා ලංකාවේ සිසුන්ට මැලේසියාව තුළ අධ්‍යාපනය ලැබීමේ අවස්ථා පුළුල් කිරීමේ නව ක්‍රමවේදයක් සකසන ලෙස ද මැලේසියා අග්‍රාමාත්‍යවරයා වෙත යෝජනා කළේය.

වසර 09 කට පෙර කෘෂිකර්ම අමාත්‍යවරයා ලෙස තමා මැලේසියාවේ සිදුකළ නිල සංචාරය ද මෙහිදී සිහිපත් කළ ජනාධිපතිතුමා මැලේසියාව කෘෂිකාර්මික වශයෙන් ලබා ඇති ප්‍රගතිය එහිදී තමා සියැසින් දැකබලාගත් බවත් ශ්‍රී ලංකාවේ කෘෂිකර්මාන්තය සඳහා මැලේසියාවේ තාක්ෂණික සහය අපේක්ෂා කරන බවත් කියා සිටියේය.

මෙහිදී අදහස් දැක්වූ මැලේසියා අග්‍රාමාත්‍යවරයා ප්‍රකාශ කළේ අද ශ්‍රී ලංකාවේ සහජීවන සහ සංහිඳියා වැඩපිළිවෙළ මුළු ලෝකයේම අවධානයට ලක්ව ඇති බවයි.

ශ්‍රී ලංකාව සමඟ අයෝජන සහ වෙළඳ අවස්ථා සෑම ක්ෂේත්‍රයක් තුළින්ම වැඩිදියුණු කර ගැනීම මැලේසියාවේ අපේක්ෂාව බව පැවසූ අග්‍රාමාත්‍යවරයා ශ්‍රී ලංකාවේ අධ්‍යාපන ක්ෂේත්‍රයේ සංවර්ධනය වෙනුවෙන් ඕනෑම අවස්ථාවක සහය දැක්වීමට සූදානම් බවද කියා සිටියේය.

එමෙන්ම තාක්ෂණික පුහුණුව සඳහා මැලේසියාව තුළ වැඩි ඉඩක් පවතින බව පෙන්වා දුන් අග්‍රාමාත්‍යවරයා එම ක්ෂේත්‍රය තුළ ශ්‍රී ලංකාවට සහය දැක්වීමට සූදානම් බව ද කියා සිටියේය.

දෙරට අතර සංචාරක ව්‍යාපාරය වැඩිදියුණු කර ගැනීම පිලිබඳව ද මෙහිදි නායකයින් අතර සාකච්ඡාවට ලක් විය.

තම ආරාධනය පිළිගෙන මැලේසියාවේ සංචාරයක නිරතවීම පිලිබඳව මෙහිදී මැලේසියා අග්‍රාමාත්‍යවරයා ජනාධිපතිතුමා වෙත සිය විශේෂ ස්තූතිය පළ කර සිටියේය.

මැලේසියාවේ නිල සංචාරයකට ශ්‍රී ලාංකික රාජ්‍ය නායකයෙකුට නිල ආරාධනයක් ලැබණේ වසර 19 කට පසුව බවත්, නව රජයේ ප්‍රතිපත්තිවලට වටිනාකමක් ලබා දෙමින් මැලේසියා රජය සිදු කළ එම ආරාධනය පිලිබඳ තමා ස්තූතිවන්ත වන බවත් ජනාධිපතිතුමා ප්‍රකාශ කළේය.

ශ්‍රී ලංකා මැලේසියානු තානාපති සබඳතාවලට වසර 60 ක් සපිරීමේ සංවත්සරය ශ්‍රී ලංකාව තුළ සමරන බවද ජනාධිපතිතුමා කියා සිටියේය.

නුදුරු දිනකදීම නිල සංචාරයක් සඳහා ශ්‍රී ලංකාවට පැමිණෙන ලෙස ද ජනාධිපතිතුමා මෙහිදී මැලේසියා අග්‍රාමාත්‍යවරයා වෙත ආරාධනා කළේය.

විදේශ කටයුතු අමාත්‍ය මංගල සමරවීර, විදේශ රැකියා නියෝජ්‍ය අමාත්‍ය මනූෂ නානායක්කාර, සංස්කෘතික කටයුතු නියෝජ්‍ය අමාත්‍ය පාලිත තෙවරප්පෙරුම, කොළඹ හිටපු නගරාධිපති ඒ.ජේ.එම්. මුසාමිල් යන මහත්වරුන් ද ශ්‍රී ලංකාව නියෝජනය කරමින් මීට එක්ව සිටියහ.

01-11-1024x1304 02-6-1024x1591 05-8-1024x729 08-4-1024x324 09-5-1024x706 11-5-1024x631