ශ්‍රි ලංකා නිදහස් පක්ෂය වසර 64 ක් පුරාවට පවත්වන ලද සියලූ සංවත්සර උත්සවයන්ට වඩා අභිමානවත් සහ විශිෂ්ට ලෙස එහි 65 වන සංවත්සර උත්සවය සැප්තැම්බර් 04 වනදා කුරුණෑගලදී පවත්වන බව ජනාධිපතිතුමා පවසයි.

ශ්‍රී ලංකා නිදහස් පක්ෂයට සිය අනන්‍යතාවය තුළ පක්ෂය ගොඩනැඟීමේ පූර්ණ නිදහස සහ අයිතිය තිබෙන බව පැවසූ ජනාධිපතිතුමා සම්මුතිවාදී ආණ්ඩුවක් තුළ දේශපාලන පක්ෂවල අනන්‍යතාවය කිසිසේත් දුර්වල වී නොමැති බවත් තම අනන්‍යතාවය තහවුරු කර ගනිමින් ඉදිරියට යාමට කිසිදු පක්ෂයකට බාධාවක් නොමැති බවත් ප්‍රකාශ කළේය.

ජනාධිපති ගරු මෛත්‍රීපාල සිරිසේන මැතිතුමා මේ බව ප්‍රකාශ කළේ ඊයේ (11) පස්වරුවේ ශ්‍රී ලංකා නිදහස් පක්ෂ මුලස්ථානයේ පැවැති ශ්‍රී ලංකා නිදහස් පක්ෂ කාන්තා සංවිධානයේ වැඩමුළුවකට එක් වෙමිනි.

“සවිබල රටක් – තිරසාර හෙටක්” තේමාව යටතේ සියයට 25 ක කාන්තා නියෝජනය තහවුරු කරමු මැයෙන් වැඩමුළුවව සංවිධානය කර තිබුණි.

එම අවස්ථාව ඇමතූ ජනාධිපතිතුමා වැඩිදුරටත් ප්‍රකාශ කළේ ශ්‍රී ලංකා නිදහස් පක්ෂයේ ඉතිහාසය යනු මෙරට කාන්තාවන් අභිෂේක කළ යුගය බවයි.

මේ රටේ සමස්ථ මව්වරුන්ගේ මෙන්ම දියණියන්ගේ සහ සොහොයුරියන්ගේ යහපත උදෙසා ශ්‍රී ලංකා නිදහස් පක්ෂ කාන්තා සංවිධානය ශක්තිමත් කරමින් ඉදිරියට ගෙන යා යුතු බවද ජනාධිපතිතුමා පැවසීය.

ශ්‍රී ලංකා නිදහස් පක්ෂය ශක්තිමත් කිරීම තුළ දේශීය චින්තනය, අපේ සංස්කෘතිය සහ අපේකම්වලට ඉහළ වටිනාකමක් හිමිවන බව පැවසූ ජනාධිපතිතුමා ඒ තුළින් වඩා යහපත් සමාජයක් ගොඩනැගෙන බව ද කියා සිටියේය.

ශ්‍රී ලංකා නිදහස් පක්ෂය අද එක්සත් ජාතික පක්ෂය සමඟ එක්ව ආණ්ඩු කරන්නේ ඉතා පිරිසිදු චේතනාවකින් බව ද පැවසූ ජනාධිපතිතුමා පසුගිය රජය අපට භාරදුන් ආර්ථීක අර්බුදය සහ එක්සත් ජාතින්ගේ මානව හිමිකම් කොමිසන් සභාවේ චෝදනාවලට මුහුණදෙමින් ඒවා නිරවුල් කරගෙන රට ඉදිරියට ගෙන යන විට විවිධ ආකාරයේ චෝදනා එල්ල කරන බවද කියා සිටියේය.