වසා දමා ඇති ඇඹිලිපිටිය කඩදාසි කම්හල ජාතික සම්පතක් ලෙස යළි ගොඩනගන බව ජනාධිපතිතුමා පවසයි.

පසුගිය සමයේ දේශීය කර්මාන්තශාලා දැවැන්ත ඇද වැටීමකට ලක්වූ අතර කර්මාන්ත ශාලා 500 ක් පමණ වැසී ගිය බව ද සිහිපත් කළ ජනාධිපතිතුමා දේශීය කර්මාන්ත ශක්තිමත් කරමින් දේශීය ආර්ථීකය ගොඩනැගීම වත්මන් රජයේ ප්‍රතිපත්තිය බව කියා සිටියේය.

ජනාධිපති ගරු මෛත්‍රීපාල සිරිසේන මැතිතුමා මේ බව ප්‍රකාශ කළේ ඇඹිලිපිටිය ශ්‍රී බෝධිරාජ ධර්මායතනයේ අභිනවයෙන් ඉදිකරන ලද ශ්‍රී සර්වඥ ධාතු මන්දිරය විවෘත කිරීමේ පුණ්‍යෝත්සවයට අද (18) පස්වරුවේ එක්වෙමිනි.

ගව ඝාතනයට සහ ගව මස් ආහාරයට ගැනීමට එරෙහිව දිගු කලක පටන් ලාංකීය සමාජයේ පවතින හඬට නව ජවයක් එක් කරමින් ගවයින් නිදහස් කොට මුදා හැරීම සඳහා මහවැලි අධිකාරියට අයත් අක්කර 100 ක භූමි ප්‍රමාණයක් නිදහස් කිරීම ද මෙම පිංකම් මාලාවට ඇතුළත් විය.

එම ඉඩම් හිමිකම ශ්‍රී බෝධිරාජ පදනම වෙත පවරාදීම මෙහිදී ජනාධිපතිතුමා අතින් සිදු විය.

ඒ පිලිබඳ අදහස් දැක්වු ජනාධිපතිතුමා ප්‍රකාශ කළේ බෞද්ධ හා හින්දු දර්ශන තුළ අවිහිංසාවාදය උතුම් ප්‍රතිපත්තියක් කොට සලකන බැවින් මෙම කටයුත්ත ජාතික මෙන්ම ජාත්‍යන්තර වටිනාකමින් සමන්විත වනු ඇති බවය.

මහවැලි බල ප්‍රදේශවල ඉඩම්වලට බදු අය කිරීමේදී යම් වෙනසක් සිදුව ඇති බවත්, ඒ පිලිබඳ සහනයක් ලබාදෙන ලෙසත් ශ්‍රී බෝධිරාජ ධර්මායතනයේ විහාරාධිපති පූජ්‍ය ඕමල්පේ සෝභිත ස්වාමින් වහන්සේ කරන ලද ඉල්ලීම කෙරෙහි මෙහිදී අවධානය යොමු කළ ජනාධිපතිතුමා ඒ පිලිබඳ කඩිනමින් සොයා බලා සහන සළසන බවට පොරොන්දු විය.

ඇඹිලිපිටිය රෝහලේ අඩු පාඩු ද කඩිනමින් සම්පූර්ණ කර රෝහල සංවර්ධනය කිරීමට පියවර ගන්නා බව ජනාධිපතිතුමා ප්‍රකාශ කළේය.

ශ්‍රී බෝධිරාජ පදනම මුල් කර ගනිමින් ක්‍රියාත්මක වන දියර කිරි භාවිතය ප්‍රචලිත කිරිමේ වැඩසටහන මෙන්ම කාබනික පොහොර නිෂ්පාදන වැඩසටහන ද මෙහිදී ජනාධිපතිතුමාගේ ඇගයීමට ලක්වූ අතර කාබනික පොහොර නිෂ්පාදනයේ ප්‍රථම වාර්තාව ජනාධිපතිතුමා වෙත පිළිගැන්වීම ද සිදු විය.

ජනාධිපතිතුමා විසින් සර්වඥ ධාතුන් වහන්සේ රැගත් කරඬුව පෙරහැරෙන් වැඩම කරවීමෙන් අනතුරුව අභිනව ධාතු මන්දිරයේ තැන්පත් කිරීම සිදු විය.

ජනාධිපතිතුමා ඊට ප්‍රථම පූජෝපහාරය දැක්වීමෙන් අනතුරුව සැදැහැවත් ජනතාවගේ වන්දනාමාන කටයුතු සඳහා ධාතු මන්දිරය විවෘත කෙරිණි.

“ඇඹිලිපිටිය වෘතාන්තය” ග්‍රන්ථය මෙහිදී ජනාධිපතිතුමා වෙත පිළිගැන්විණි.

ශ්‍රී ලංකා රාමඤ්ඤ මහා නිකායේ මහානායක අතිපූජ්‍ය නාපානේ ප්‍රේමසිරි නායක ස්වාමින් වහන්සේ ප්‍රමුඛ මහා සංඝරත්නය ද, අමාත්‍යවරුන් වන පාඨලි චම්පික රණවක, තලතා අතුකෝරළ, නියෝජ්‍ය අමාත්‍ය දුනේෂ් ගන්කන්ද යන මහත්වරුන් ඇතුළු මහජන නියෝජිතයින් පිරිසක් ද, සිංගප්පූරුව, කාම්භෝජය, චීනය සහ වියට්නාමය රටවල් නියෝජනය කරමින් නියෝජිත පිරිසක් ද පුණ්‍යෝත්සවයට එක්ව සිටියහ.

 

13511001_10208649258783341_4046132214376953124_n 09-5-1140x713 02-12-1024x393 04-11-1024x737 13-3-1024x1103 14-3-1024x629 15-1024x536 16-1-1024x413

LEAVE A REPLY