මට්ටක්කුලිය සමිත්පුර ප්‍රදේශයේ ඊයේ (23) රාත්‍රී සිදු වූ වෙඩි තැබීමෙන් පුද්ගලයින් සිව් දෙනෙකු මියයාමේ සිද්ධිය පාතාල කල්ලි සාමාජිකයින් දෙපිරිසක් අතර ඇති වූ ගැටුමක ප්‍රතිඵලයක් බව පොලිසිය පවසයි.

සිද්ධියෙන් තුවාල ලැබූ තවත් තිදෙනෙකු මේ වනවිට කොළඹ ජාතික රෝහලේ ප්‍රතිකාර ලබයි.

පොලිස්පතිවරයාගේ උපදෙස් පරිදි කොළඹ අපරාධ කොට්ඨාශය මේ පිළිබඳ විමර්ශනයක් ආරම්භ කර තිබේ.

ඊයේ රාත්‍රී 7.30 ට පමණ මට්ටක්කුළිය පොලිස් වසමේ සමිත්පුර ප්‍රදේශයේදී මෙම වෙඩි තැබීම සිදු විය.

ඉන් පුද්ගලයින් 07 දෙනෙකු බරපතල තුවාල ලැබූ අතර ඔවුන් කොළඹ ජාතික රෝහලට ඇතුළත් කිරීමේ දී සිව් දෙනෙකු මියගොස් සිටියේය.

‘චූටි උක්කුන්’

මියගිය පුද්ගලයින් අතර සිටින ආර්. පී. නුවන් සංජීව නොහොත් ‘‘චූටි උක්කුන්’’ නමැති 29 හැවිරිදි පුද්ගලයා ‘‘ආමි සම්පත්’’ නමැති පාතාල කල්ලි සාමාජිකයාගේ සමීපතමයෙක් වන බව වාර්තා වේ.

එමෙන්ම ඔහු ‘‘සංඛ’’ නමැති පාතාල කල්ලි සාමාජිකයා සමග ද සබඳතා පවත්වා ඇති බව පොලිස් පරීක්ෂණවල දී අනාවරණ වී ඇත.

මෙම වෙඩි තැබීමෙන් 24 හැවිරිදි රංග පෙරේරා නමැත්තෙකු සහ 26 හැවිරිදි දෙනුවන් නමැත්තෙකු ද මිය ගොස් ඇත.

සිද්ධියෙන් මියගිය අනෙක් පුද්ගලයා වන්නේ 29 හැවිරිදි මොහොමඩ් මවුන් නමැත්තෙකි.

වෙඩි වැදීමෙන් බරපතල තුවාල ලබා රෝහල්ගත කර සිටින පිරිස අතර චාමර සඳරුවන් නමැති පුද්ගලයෙකු ද සිටියි.

ඔහු අදාළ සිද්ධියෙන් මියගිය ආර්. පී. නුවන් සංජීව නොහොත් චූටි උක්කුන්ගේ සහෝදරයෙකු බව පොලිසිය පවසයි.

තුවාල ලැබූ ශ්‍රී කාන්ත් නමැත්තෙකු ද කොළඹ ජාතික රෝහලේ ප්‍රතිකාර ලබයි.

එමෙන්ම ඉසාඩ් මොහොමඩ් නමැත්තෙකු ද තුවාල ලබා රෝහල්ගතව ප්‍රතිකාර ලබන බවයි පොලිසිය පවසයි.

ඔහු පුද්ගල ඝාතනයකට සම්බන්ධ අයෙකු බවට ද විමර්ශනවල දී අනාවරණය වී තිබේ.

ගැටුමට හේතුව ?

ඉකුත් 2014 වසරේ දී පාතාල කල්ලි සාමාජිකයෙකු බව කියන රොෂාන් නමැත්තාගේ පියා කිසියම් පිරිසක් විසින් කපාකොටා ඝාතනය කර තිබිණ.

එය සිදු කර තිබෙන්නේ මෙම වෙඩි තැබීමෙන් මියගිය ආර්. පී. නුවන් සංජීව නොහොත් චූටි උක්කුන් නමැති පුද්ගලයා විසින් බවට සැක කෙරේ.

ඔහු කලක් රක්ෂිත බන්ධනාගාරගතව සිට මීට දින කිහිපයකට පෙර නිදහස ලබා පැමිණ ඇත.

රොෂාන් නමැත්තාගේ පියා ඝාතනය කිරීම සම්බන්ධයෙන් පැවති ආරවුල දුරදිග යාමෙන් මෙම වෙඩි තැබීම සිදුව ඇති බවට දැනට සිදු කර ඇති විමර්ශනවල දී අනාවරණ වී ඇත.

14794234_329203464102416_1814510101_n 14799040_329203377435758_1987773012_n

LEAVE A REPLY