මිග් යානා ගනුදෙනුවට අදාළ නඩුවේ සැකකරුවෙකු ලෙස නම් කර සිටින හිටපු ජනාධිපති ආර්යා ශිරන්ති රාජපක්ෂ මහත්මියගේ ඥාති සොහොයුරෙකු වන රුසියාවේ හිටපු ශ්‍රී ලංකා තානාපති උදයංග වීරතුංග ජාත්‍යන්තර පොලීසිය මාර්ගයෙන් අත්අඩංගුවට ගන්නා ලෙස කොළඹ කොටුව මහේස්ත්‍රාත් අධිකරණය වරෙන්තුවක් නිකුත් කර තිබේ.

පොලිස් මුල්‍ය අපරාධ විමර්ශන කොට්ඨාසය විසින් සිදුකළ ඉල්ලීමක් සළකා බැලූ අධිකරණය මෙම නියෝගය ලබාදුන් බව අද දෙරණ අධිකරණ වාර්තාකරු පැවසුවේය.

මීට පෙර ද උදයංග වීරතුංග මහතා අත්අඩංගුවට ගැනීම සඳහා ජාත්‍යන්තර වරෙන්තු නිකුත් කරන ලෙස පොලිස් මූල්‍ය අපරාධ විමර්ශන කොට්ඨාසය අධිකරණයෙන් ඉල්ලීමක් කර තිබුණි.

එම අවස්ථාවේ වරෙන්තු නිකුත් කිරීම ප්‍රතික්ෂේප කළ කොළඹ කොටුව මහේස්ත්‍රාත් ලංකා ජයරත්න මෙනවිය දැනුම්දුන්නේ උදයංග වීරතුංග මහතා ඒ වන තෙක් අදාළ සිද්ධියේ සැකකරුවෙකු ලෙස නම් කර නොමැති බැවින් වරෙන්තු නිකුත් කළ නොහැකි බවයි.

කෙසේවෙතත් මේ වන විට ඔහු අදාළ සිද්ධියේ සැකකරුවෙකු ලෙස නම් කරමින් මූල්‍ය අපරාධ කොට්ඨාසය අධිකරණයට වාර්තාවක් ඉදිරිපත් කළ බව අද දෙරණ වාර්තාකරු සඳහන් කළේය.

එම වාර්තාව පිළිගත් කොටුව මහේස්ත්‍රාත්වරිය අදාළ වරෙන්තුව නිකුත් කිරීමට පියවර ගෙන ඇත.

LEAVE A REPLY